Bir neçə il əvvəl Hon Konqda yerləşən estetik cərrahiyyə klinikalarından biri tərəfindən reklam kampaniyası başladılmışdır. Reklamda göstərilirdi: “Plastik əməliyyatdan sonra narahatlıq duymalı olduğunuz yeganə məsələ bunu ailə üzvlərinizə izah etməyinizdir”.
Bəhs edilən reklamın əlaqəli olduğu məhkəmə işi Jian Feng adlı bir şəxsin arvadının evlilikdən əvvəl keçirdiyi gizli plastik əməliyyatlarla bağlıdır. Belə ki, cütlüyün körpələrinin dünyaya gəlməsindən sonra şəxs arvadının görünüşünə dair şübhələr duymağa başlamışdır. O, uşağın “eybəcər” göründüyünü və onun valideynlərindən heç birinə bənzəmədiyini iddia etmişdir. Qəzəblənən şəxs bundan sonra arvadını xəyanətdə ittiham etmiş, lakin aparılan DNT testləri onun yeni doğulan körpənin bioloji atası olduğunu sübut etmişdir. Bu cür ağır ittihamla üzləşən qadın nəticədə xarici görünüşünü kəskin şəkildə dəyişdirən plastik əməliyyatlar üçün təxminən 100.000 dollar xərclədiyini etiraf etmişdir.
Məhkəmə işinin yekununda hakim qadının görkəmini cərrahi yolla dəyişdirməsi barədə ərinə məlumat verməli olduğu qənaətinə gələrək onun keçmiş ərinə 120.000 dollar təzminat ödəməli olması barədə qərar çıxarmışdır. Hakimin qərarı ilə razısınızmı?
