“Naruto Slaterə qarşı” işində Naruto adlı meymun təbiət fotoqrafının kamerası ilə çəkdiyi selfilərin müəlliflik hüquqlarının pozulması əsası ilə fotoqrafı məhkəməyə vermişdir. Mübahisə isə fotoqraf David Slater və nəşriyyat şirkəti “Wildlife Personalities” şirkətinin meymun selfilərini albom şəklində nəşr etdirməsi ilə başlamışdır.
Narutonun təmsilçisi “PETA” şirkəti isə iddia edirdi ki, selfilər Slaterin köməyi olmadan bir sıra məqsədyönlü və könüllü hərəkətləri nəticəsində Narutonun özü tərəfindən çəkilmişdir və şəkillərin müəllifi odur. “PETA”ya görə, Narutonun bu selfilər üzərində müəlliflik hüququ mövcuddur və ona müəlliflik hüquqlarının pozulmasına görə dəymiş ziyanın qarşılığı və şəkil ilə bağlı potensial gəlirləri əldə etmək hüququ verilməlidir. “PETA” həmçinin cavabdehdən selfilərin surətini çıxarmaqdan, başqa adla rəsmiləşdirməkdən çəkinməsini və icazəsiz istifadəyə görə zərərin ödənilməsini tələb etmişdir.
Məhkəmə Narutonun iddiasının “Müəlliflik hüquqları” Qanunu ilə tənzimlənmədiyinə qərar verərək cavabdehin iddianın rədd edilməsi barədə vəsatətini təmin etmişdir. Buna baxmayaraq, Apellyasiya Məhkəməsi meymunun fotoşəkillərin müəllifi və sahibi olduğunu, onun maddi zərər çəkdiyini sübut etməyə kifayət qədər fakt olduğunu bildirmiş, lakin Narutonun mövcud iddia üzrə qanuni səlahiyyətlərinin olmadığına qərar vermişdir, çünki “Müəlliflik hüquqları” Qanunu heyvanlara müəlliflik hüquqlarının pozulması ilə bağlı iddia qaldırmağa icazə vermirdi. Bununla belə, Apellyasiya Məhkəməsi şikayəti rədd etməkdən də imtina etmiş və qərarın müvafiq sahə ilə bağlı mübahisələrdə aşağı instansiya məhkəmələrinə presedent olacağını bildirmişdir. Məhkəmə işi Slater vǝ “PETA” arasında barışıq sazişinin bağlanması ilə başa çatmışdır. Sazişə əsasən, Slater selfilərdən istifadəyə görə qazandığı gəlirinin 25 faizini təbiəti qoruyan xeyriyyə təşkilatlarına bağışlamağa razılıq vermişdir.
