Əgər vətəndaşın adına pay torpağı varsa, o, pay torpağının sənədini (yəni çıxarışı) əldə etdikdən sonra onu müvafiq icra hakimiyyəti orqanında, yəni İqtisadiyyat Nazirliyi yanında Dövlət Vergi Xidmətində qeydiyyata salmalıdır. Müraciətdən sonra vətəndaşa VÖEN açılır və VÖEN üzrə sığortaedənlərin uçot nömrəsi (yəni SUN kod) verilir. Müraciətlə bağlı əsas məqam isə ondan ibarətdir ki, şəxsə bu halda sosial yardım o zaman təyin edilə bilər ki, şəxs vergi ödəyicisi kimi həmin pay torpağı ilə bağlı ən azı 6 ay ərzində ardıcıl olaraq məcburi sosial sığorta ödənişlərini ödəmiş olsun. Pay torpağı olan vətəndaşlar yalnız istifadə etdikləri pay torpağına dair bu ardıcıl ödənişləri etdikdən sonra sosial yardım almaq üçün müraciət edə bilərlər.
Dövlət Sosial Müdafiə Fondu tərəfindən sözügedən ödənişlərin edilməsinin təsdiq edilməsi üçün vətəndaşlardan tələb olunan “sabit qəbz”in təqdim edilməsi isə Dövlət Vergi Xidməti tərəfindən “sabit qəbzin proaktiv təqdim edilməsi” elektron xidməti vasitəsilə elektron qaydada həyata keçirilir.
Həmçinin bildiririk ki, vətəndaşların adında istifadə etmədikləri pay torpağı varsa, bu zaman ünvanlı dövlət sosial yardımı təyin edilmir və ya dayandırılır.
