Qəbul edilmiş Qərardada əsasən, cavabdeh uşaqlarına ödədiyi alimentin 50 faizinin uşaqların qidalanması, məişət qayğılarının çəkilməsi, tərbiyəsi və təhsili üçün yetərli olmasını əsas gətirərək alimentin qalan hissəsinin uşaqların adına açılan bank hesabına köçürülməsi barədə məhkəməyə müraciət edə bilər.
Nəzərə alınmalıdır ki, cavabdeh bununla bağlı müraciəti məhkəmənin alimenti təyin etməklə bağlı qətnaməsi qüvvəyə mindikdən sonra alimenti təyin etməklə bağlı qətnamə qəbul edən məhkəməyə edə bilər. Məhkəmə tərəfindən aliment ödəyən şəxsin alimentin 50 faizini bank hesabına köçürməklə bağlı tələbinə baxıldıqda aliment yenidən tutulmur və ya onun məbləği müəyyən edilmir, yalnız alimentin bir hissəsinin hansı qaydada ödəniləcəyi müəyyən olunur. Buna görə də bu işlərə iddia icraatı qaydasında deyil, icra icraatı qaydasında baxılaraq, müvafiq qərardad qəbul edilir. Bu, alimentin ödənilməsi ilə bağlı məsələlərin daha çevik və qısa müddətdə həllinə imkan verir. Əgər cavabdeh tərəfindən iddia ərizəsi ilə məhkəməyə bununla bağlı müraciət ünvanlanmışdırsa, bu zaman həmin iddia ərizəsi geri qaytarılmalı, əgər iş səhvən icraata qəbul edilmişdirsə, iş üzrə icraata xitam verilməldir.
Hər iki halda iddiaçıya məhkəmə qətnaməsinin icra qaydasının müəyyən edilməsi barədə ərizə ilə aidiyyəti məhkəməyə müraciət etmək hüququ izah edilməlidir. İstinad: Azərbaycan Respublikası Ali Məhkəməsinin 8 dekabr 2023-cü il tarixli Qərardadı.
